هوّ لسه فيه صكوك؟
الغلابه كل مرة بيسألوك
همه إمتى قالوا لأ أو زعلوك
الهرم بيعه وبيع وادى الملوك
بس قوللى قَبلها وحياة أبوك
القفا اللى اتصك له عندك سؤال
مش كفاية ولا لسه فيه صكوك
* * *
الماهية كلها ما تجيبش عيش
لو لقيته إن أكلته ياموت ياعيش
ويقولولى إنت ليه ما بتختشيش
هو مسلم وإحنا من كفار قُريش؟!
إمتى يعرف إنى فاهم قصده إيه
كله باعه... واللى فاضل ما يساويش
* * *
البلد دى ملكنا وغالية علينا
واللى بيفكر يبيعها بيعادينا
واللى حتبيعها له بكره حيشترينا
مين عطاك الحق تتجنى علينا
لو تفرّط يوم فى ذرة من ترابها
لا انت محمود مننا.. ولا محيى لينا
* * *
إنت عايش زينا على أرض مصر
إنت أهلك فى الدويقة اتاخدوا غدر
حد فى العبّارة مات أو حرقه قطر
واللى ضايع واللى مش عارفين له قبر
قوللى مين الجوع فى أهلك عصره عصر
لينا رب.. وإنتى ليكى الله يا مصر
ليست هناك تعليقات:
إرسال تعليق